Ni 9.10.2018 khan Zawlnuam-ah Cleanliness Week Closing function hman a ni a. He hun hi Pu Lalnunfela Chawngthu, BDO Zawlnuam, Town Sanitation Committee Chairman ni bawk chuan a hmanpui.

Pu Lalnunfela Chawngthu chuan Zawlnuam khuain Mizoram puma khawpui fai inelna-a lawmman 2-na kan la thei chu khawtlang inlungrualna leh thawhhona that vang a ni tiin Mizoram khawpui fai ber ni tura nasa zawka tan kan lakzel a tul a ni a ti.

Cleanliness Week chhung hian inelna hrang hrang Town Waste Management Plan insiam siak leh Sanitation Photo Competition-te buatsaih niin a ti thate hnenah lawmman sem nghal a ni a. Pawl leh kohhran hrang hrangte pawhin Week chhung hian khawlai leh a vel tihfai hnatlang an nei bawk.

Cleanliness Week kharna pual hian faina thuziak kengin khawtlang huap kawngzawh (Rally) neih a ni a. Veng pathum - Bawrai, Thuampui leh Vengpui atanga kawngzawh niin Thuampui kawnah intawhkhawm a ni.

He hun hi Pu J. Lalsawmliana, Vice Chairman, Town Sanitation Committee-in kaihruaiin Zawlnuam khawtlang mipui bakah School naupang an tel tha hle a ni.