Vawiin khan Vairengte Multipurpose Hall-ah Mizo Zirlai Pawl, Vairengte headquarter buatsaihin kumina HSLC leh HSSLC pass thar te lawmpuina hun leh  Career Awareness hman a ni a; Pu Joseph Lalhimpuia, Parliamentary Secretary chuan a hmanpui.

Parliamentary Secretary Pu Joseph Lalhimpuia pawhin zirlai hlawhtling tharte chu a lawmpui thu sawiin an kal zelna duh turah duhsakna a hlan a. Zirlai titha chawimawite hian intlansiakna bul an tan chauh tih hria a, an hmalamah intihsiakna tam tak an la hmachhawn dawn tih hria a, taimakna nen tang zual zel turin a fuih a. Zirlaibu piahlamah internet atanga engkim an hmuh theih tawhna khawvelah remchanna lei zel a, thil thalo erawh hnawl turin a fuih bawk a. Zirlai inang an zir vek tih hria a, an taimak phawt chuan khawpui mite el phaklohna chhan tur an neilo tih inhrethar turin a fuih bawk.

Pu Joseph Lalhimpuia chuan Zirtirtu thahnemngai tak tam tak an awm laia, a titha duhlo tlemte avanga naupangin a tuar thin chu pawi a tih thu sawiin, zirtirtute chu naupang hmalam hun her danglam theitu an ni tih inhria a inthlahdah a thianglo a ti a. Sorkar school  Nil result nei an awm thin chu sorkarin a ngaimawh hle a ni tiin, tanlak a ngai takzet a ni a ti a. Kum reilote chhunga zirna tihchangtlunna tura sawrkar hmalakna hrang hrang sawilangin, zirna hmasawnna atan sum dah belh zel a ni a ti a. Integrated Evaluation System hman avanga result tha zawk kan hmu thei chu lawmawm a tih thu a sawi a.  Zirtirtu indaihlohna abikin science leh mathematics subject phuru turin zirtirtu thahnem tak lak anih dawn thu te a tarlang a. Sorkar hmalakna te a hlawhtlin theih nan nu leh pa, khawtlang hruaitute leh zirlai te thawh pui tur leh tawiawm turin a sawm a ni.

Zirlai pass thar lawmpuite hi HSLC leh HSSLC a Distinction leh first division a pass mi 31 an ni a, lawmpuina thuziak leh thilpek hlan an ni. Vawiin hunah hian career awareness hun hman nghal a ni a. Mizoram Secondary School Teachers Association hruaituten he hun hi an hmanpui bawk.