Champhai District huam chhunga High & Higher Secondary School 84 zirtirtute puala Adolescence Education Programme Training chu nimin khan I&PR Auditorium, CHANEM building ah tan a ni.

Tleirawlte nunkawng dik zirtirna, AEP Training, chawlhkar khat awh tur vawiina hawnnaah Pu Hualrikhuma, DPO, RMSA, Champhai District chuan Champhai leh a chheh vela ruihhlo ti hluar ta lutuk kara hetiang training buatsaih a ni chu lawmawm a tih thu a sawi a, Zirtirtu kalkhawmte chu training atanga hlawkna puak chhuah ngei tuma inzir turin a chah bawk.

AEP hi sawrkar laipui, Ministry of Human Resourse & Development leh National AlDS Control Organization (NACO) ten kum 2005 khan tangkawpa duangin nikum atang khan Mizoram-ah MS ACS leh School Education Department ten thawhdunna an siam a. Tunkar, ni 20-25 January, 2014 chhungin Champhai bakah Lawngtlai, Lunglei, Serchhip, Aizawl leh Mamit District-ah te High & Higher Secondary School, 252 atangin Principal/Headmaster leh Zirtirtu 2 te tan training runpui a kalpui mek a ni.