Mizoram Tourism Department leh Tripura Zo Kutpui Organizing Committee tangkawpin an buatsaih Zo Kutpui chu Vanghmun khua, Tripura ah vawiin khan Chief Minister Pu Zoramthanga chuan Kut Pa niin a hmanpui. He hunah hian Food and Civil Supplies & Corporate Affairs Minister Pu K. Lalrinliana chu Kut Uaptu niin, Tourism Minister Pu Robert Romawia Royte chu Kut Thlengtu a ni a. Dy. Govt. Chief Whip Pu Lalrintluanga Sailo, Manpower Development Committee Vice Chairman Pu Zothantluanga te he inkhawmah hian a tel bawk. Zo Kutpui hi ni thum awh tur niin nimin atang khan neih tan a ni.

Kut Pa Chief Minister Pu Zoramthanga chuan Zofate inpumkhatna pawimawh thu leh hmasawnna atan remna a tul thu a sawi a. Jampui tlangdung a Zofa chengte chu an mamawh hrang hrangte tihlawhtlin sak theih dan tur ngaihtuahsak a theihtawp chhuah a nih tur thu a sawi bawk. Chief Minister chuan Zoram hi Pathianin malsawmna tam tak a pek a, chu malsawmna ruai chu mi tin, mi hausa leh mi rethei ten an kil phak theih tura chawihniam chu kan hmabak a ni tiin, sawrkar bakah pawl leh mimal tin te hma kan lak tlan a pawimawh a ni, a ti a.

Chief Minister chuan hnam inpumkhatna turin hmun tin a Zofate thawh leh beihna te chu a nep loh thu a sawi a. Mizoram chu remna sual chhuak tawh state niin, remna in hmasawnna a thlen dan pawh hriat a ni a. Mizoram chhehvel state leh thenawm ram ten remna an siamna turah Mizoram an lo rawn thin tawh thu a sawi a. He remna hi tu mimal emaw pawl pakhat avang chauh ni lovin Pathian kaihhruaina vang vek a nih thu Pu Zoramthanga chuan a sawi a ni.

Kut Uaptu LAD Minister Pu K. Lalrinliana chuan thu sawiin, kut hlimawm tak ruahman a ni chu lawmawm a tih thu a sawi a. Tripura a Zofa chengten tha taka an lo dawnsawnna ah lawmthu sawiin, khawi hmunah pawh awm mah ila Zohnahthlak te hi kan inkungkaihna theihnghilh lova kan tihngheh zel hi a pawimawh a ni, a ti.

Kut Thlengtu Minister of State Pu Robert Romawia Royte chuan kut hmang tura kalkhawmte lawmna thu sawiin, Zo Kutpui chu Zofate kal zelna tura mel lung pawimawh tak a nih reng tawh tur thu a sawi a. Zo Kutpui in a tum chu khawvel hmun hrang hranga Zofate inunauna leh inpumkhatna a lo ngheh zual zel theihna tur a nih thu a sawi a. Kan inpawhtawn a kan inpumkhat tlat chuan Mizoram chhung leh pawn a Zofaten kan zavaiin kan hlawkpui tlang vek dawn a ni, Tourism Minister chuan a ti a ni.

Zo Kutpui hi nimin khan Inpumkhatna Seminar nei a hman tan a ni a. Vawiin hian vantlang inkhawm leh cultural programme a hun hman niin, naktukah vantlang inkhawm buatsaih lehin kut hi khar a ni ang. Vawiin Zo Kutpui chawhma vantlang Inkhawm hi Organising Committee Chairman Pu J. Lalthangmawia'n a kaihruai a, Organising Secretary Pu Lalduhsanga Thangluah chuan report & introduction hun hmangin Central YMA leh ZORO aiawh ten thu an sawi bawk ang a, zai leh lam hrang hrang ngaihthlak a thlirho a ni.

Kut chhim tur hian Mizoram atangin Tripura Zohnahthlak thahnem tak an kalkhawm a ni.

Chief Minister hian kut a hmanpui bakah nimin leh vawiin khan Zampui tlangdung a khaw hrang hrang tlawhin, mipuite nen inkawmna hun a hmanpui bakah vantlang mamawh an thlente chu tihlawhtling tura theihtawp a chhuah tur a sawi a ni.