Goods and Service Tax zir tura India sorkarin a tirha thang mek Indian Delegation of Empowered Committee zinga tel Taxation Minister Pu Zodintluanga leh a kalpuite chuan 19th September, 2012 khan Canada ram khawpui Ottawa chhuahsanin Vancouver an thleng a. Vancouver hi Canada ram khawpui lian pawimawh 3 zinga chhiar tel a ni a. A ram a pharhzau avangin ram pawimawh zawk leh Asia khawmualpui dawrna kawngka pawimawh (gateway) a ni. Zirna leh sumdawnna lama hmahruaitu zinga mi a ni, a pawimawh em avangin Canada starts here tiin an sawi hial thin a ni.
Indian delegation te hian September 20-ah Deloitte & Touche, khawvela audit firm lian ber zinga mi, finance leh taxation lama mi ril (professional) hruaitute nen inkawmna zing dar 9 atanga dar 11.30 thleng neiin Canada rama GST leh Sales Tax, VAT chungchang chipchiar takin zirho a ni a. Zawhna leh chhanna hunah thil tam tak khawih tel a ni bawk. Tax chungchang bakah hian Saskatchewan Province-a thawk Senior Strategist, Innovation, Mr Andy Melnyk chuan Saskatchewan Province hausakna (agriculture, petroleum- gas/oil, mineral resources, ram ngaw khuh zau tak) lama an hausakzia leh Canada ram chawbel 50% lai an nih bakah an province atanga export an tih chhuah (kum 2011) hi 29.5 billion a nih tawh thu te sawiin India ram nena insumdawn tawnna tha tak a awm mek laiin a let tam taka tihpun theih a nih thu a sawi a. India mite hi fel leh taima tak tak an awm zel a, he province ah pawh hian India mi engemawzat pem lutin an che tha viau a ni.
Hemi ni chawhnu lamah British Columbia Finance Ministry mi pawimawh: Peter Milburn, Deputy Minister, Finance te, Jim Hopkins leh Dave Longman (senior officers) te nen chipchiar takin British Columbia Province chhunga an taxation kalpui dan enho leh a ni a. Hemi hnu hian Deputy Minister, Jobs, Tourism & Skills Training, Dave Byng chuan an Province chhunga economic development nasatzia leh thawktu mi tling leh taima an mamawh belh tamzia te a tarlang a, anni nen pawh inkawmna tha tak neih a ni a. India mite pem luh theihna leh an thawh tur tam theih dan turte tarlan a ni.
Mizoram atanga delegate kal ve te pawhin thil tam tak an zir chhuak a. Tin, Minister tawiawmtute senior officers (Pu R.L. Rinawma, Principal Secretary leh Pu Lalthangliana Varte, Commissioner of Taxes) te pawh sawihona apiangah Minister puibawmin thawk palaiah an tang chho mek zel bawk a ni.
September 20 tlai lamah remchang tak main Canada-India Business Council (CIBC) hruaitute leh member te nen inkawmna hun tha tak neih a ni a. Round Table Discussion on Opportunity for Partnership in Energy between India and Canada an huaihawtah Pu Zodintluanga leh a officers hruaite chuan ram tana thil bengvar thlak leh tangkai tur thil tam tak an zir a. Mizorama mau (bamboo) hmanga biomass energy tam tak siam chhuah theih dan thlengin tarlan a ni. He Round Table ah hian Prof. Ramprasad Sengupta, Energy lama mithiam, expert chuan presentation ropui tak a pe a. Tin, panel-ah hian energy sector-a khawvela hming lang pha vek- Manoj Singh, Wesport Innovation; John Dyke, Triumph Technology; Vivek Ratogi, Abellon Clean Energy; Daljit Bawa, Fuel Cell te an thu a ni. Thu bengvarthlak leh India ram nena indawrtawnna tur kawng pawimawh tam tak sawiho pah bawk a ni. He Round Table zawhah hian CIBC ho bawk hian Reception mawihnai tak India ram aiawh mi pawimawhte tan an buatsaih bawk a ni.
September 21-ah hian Indian Delegation chuan British Columbia khawpui pakhat Victoria-ah kalin an Parliament an tlawh a ni. Canada ram atang hian thil zir chhuah tur tam tak a awm a. An sawrkar hi lang tlang sawrkar a ni a, mipui nen an inhne hnai em em reng a. Hnathawktuten hna tihtakzetin an thawk a, mipui an induh khum lova, hlawh sang phutin buaina an nei ngai lova. Tin, hlemhletna leh sawrkar thil chheprelh tumna a awm lo bawk a ni. Chhiah lak thuah sawrkar a ngilnei a, a petu lam pawhin pumpelh ruk an tum lo a ni. An Tax lam hotu pakhat phei chuan, “Mipui lam atanga thuawihna a that em avangin, chhiah lakkhawmna dan pawh zawm nuam taka kan siam ve hi sawrkar lam bat a ni,” a ti.
Canada ramin Goods & Service Tax an kalpui dan zir tura kal Taxation Minister Pu Zodintluanga leh senior officers Pu RL Rinawma, Principal Secretary leh Pu lalthangliana Varte, Commissioner of Taxes te chuan an zinna chu hlawkthlak an ti hle a. Minister Pu Zodintluanga chuan, ram changkanga an inrelbawlna fel tak mai, mi tinin dan an zahzia te a han hmuhin Mizoramah ngei tih theih ve a chakawm thu a sawi a, dan zawm thatna apiangah mihring an zalen a ni tih a tichiang hle tih a sawi. Taxation Minister te leh a zinpuite hi 23rd September 2012-ah Tokyo pana thlawk tura beisei an ni.
