No.765/2021-2022

Dated Champhai, the 1st June, 2021: Khawtlangah Covid-19 hri inkaidarh a awm avanga May ni 5, 2021 atanga tlawhpawh phallohna hmun 'Containment Zone' a puan, Indo-Myanmar ramri dep Tiau kama awm Zokhawthar khawtlang hnenah vawiin chawhma khan Chief Minister's Relief Fund kaltlangin tanpuina pawisafai Rs 1,50,000/- (Nuaikhat singnga) hlan a ni. Tanpuina pawisafai hi Chief Minister aiawhin Addl. DC Champhai Pu Henry C.Lalrawnkima chuan hlanin, Zokhawthar khawtlang aiawhin YMA hruaituten an dawng a ni. Hemi rual hian Sub-Hqrs. YMA (SYMA) Champhai hminga Zokhawthar khawtlang tanpuina pawisafai Rs 10,000/- (Singkhat) chu President Pu F.Lalrinmuana'n a hlan bawk.

Pu Henry C.Lalrawnkima chuan India leh Myanmar inrina a awm khaw pawimawh tak, Zokhawthar khua Containment Zone a puan a nih chhunga hrikai darh zel tur chhuchat tur leh veng tura khawtlang hruaitute thawhrimna chu fakawm a tih thu sawiin, sawrkar aiawhin lawmthu a sawi a. Containment Zone a puan an nih chhunga chhuanchham mai thei dinhmuna awmte hre rengin Champhai District tana CM Relief Fund dawn Rs 2,50,000/- (Nuaihnih singnga) atanga Rs 1,50,000/- (Nuaikhat singnga) chu Champhai DC ruahmannain Zokhawthar khawtlang pek nise ti a thutlukna siam a nih thu a sawi a. Ram leh ram inrina a awm kan mi leh sate leh ram himna hi sawrkarin a ngai pawimawh hle a ni tiin, harsatna an neihte thuneitute hnena thlen hreh lo tur leh finchhuah ngaih huna finchhuah hrehlo turin a chah a. Ram leh hnam hmangaihna tak tak thinlung pu chunga thawhhopui zela sawmin, Covid-19 hrileng vanga chhuanchhamte chhawmnun zel nana hman turin CM Relief Fund kaltlang tanpuina Rs 1,50,000/- (Nuaikhat singnga) chu Zokhawthar khawtlang tan a hlan a ni.

Sub-Hqtrs.YMA (SYMA) Champhai President Pu F.Lalrinmuana pawhin thu sawiin, hun rei tak Containment Zone a awm Zokhawthar tawrhna leh harsatna tawhte an hriatpui reng thu sawiin, tih theih tam lo mahse a tul leh mamawh apianga an hman atan SYMA Champhai kaltlang tanpuina pawisafai Rs 10,000/- (Singkhat) chu Zokhawthar khawtlang tan a hlan a ni.

He hunah hian Zokhawthar khawtlang aiawhin Branch YMA President, Pu Thankunga Pachuau chuan Sawrkar, Sub-Hqrs. YMA leh Zokhawthar khawtlang tana luangchhuaktu zawng zawngte chungah lawmthu a sawi a ni.