No.6791/2020-2021

Vawiin khan SAD Conference Hall, MINECO-ah State Medicinal Plants Board (SMPB), Mizoram bul tumin “ZOMEDPLANTS” leh SMPB Official Website tlangzarhna hun buatsaih a ni a. Health Minister Dr. R. Lalthangliana’n he hun hi a hmanpui a ni.

“ZOMEDPLANTS” tlangzarhtu Health Minister Dr. R. Lalthangliana chuan Mizorama ramhnim kan neih te zirchianga "ZOMEDPLANTS" kaltlanga mihringte tana hrisel tur thil chi hrang hrang siamchhuahna tur ruahmanna chuan Mizoram tan a tha zawngin thil thar a thlen ngei ang tih a rin thu a sawi a, COVID-19 vangin thalai tam tak phai lama an hna thawk chhunzawm thei lovin an lo haw a, anni tan pawh hmalakna remchang leh entrepreneurship lama min ti thangharh lehzualtu ni ngei se a duh thu a sawi a. Pathianin thei leh ramhnim hmanga malsawmna tam tak kan rama min pek hi a tangkaina kan phawk chhuak thei a nih ngat chuan nasa lehzualin min petu hian malsawmna in min vur belhchhah ngei ang a ti a ni.

“ZOMEDPLANTS” hi State Medicinal Plants Board bul tumin, Angel Business Promoters-te nen tangkawpa buatsaih a ni a, ramhnim atanga thil chi hrang hrang siamchhuah chhinchhiahna tur (brand name) a ni a.  Ramhnim damdawi atanga ei leh in mai theih tur siamchhuahte Zomedplants hming hian mipuite lei theih turin zawrh chhuah a ni ang. vawiin  tlangzarh inkhawmah hian "ZOMEDPLANTS" product hmasa ber Mizo Sunhlu (dry candy) leh Detox Tea chu chhawpchhuah a ni bawk.

Vawiinah vek khan Dr. H. Lalchungnunga, Director of Health Services chuan State Medicinal Plants Board Official website www.smpbmizoram.com a tlangzarh bawk a. He website hi State Medicinal Plants Board chungchang leh a hmalakna hrang hrangte awlsam zawka en theihna tur a ni.

State Medicinal Plants Board (SMPB) Mizoram hi National Medicinal Plants Board, Ministry of AYUSH hnuaia din niin, Directorate of AYUSH Government of Mizoram hnuaiah a awm a. Ramhnim damdawi chinpun, humhim, zawrh chhuah leh tih hmasawn lama kawng hrang hranga hma la thin an ni.