1992/2022-2023
Khawzawl, the 20th September, 2022: Central Young Mizo Association (CYMA) leh Mizoram State AIDS Control Society (MSACS) te tangkawp buatsaih, HIV/AIDS hluar zel dona tura hmalakna, 'Zoram Harh Rawh Campaign' tih thupui kaltlanga Mizo hnam lam (folk dance) leh hla (folk song) hmanga Branch YMA te tana intihsiakna neih dan tur chungchang relin vawiin chawhma dar 11 khan Khawzawl District Level Organising Committee chu an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm.

Bawrhsap Pu C.C. Lalchhuangkima chuan kalkhawnte chu AIDS do kawnga hmalak tul zia hre thar turin a fuih a. AIDS chungchang inzirtirnain hlamchhiah a hlawh lek lek thin thu leh tih dam theih tawh loh a nih angin mitin fimkhur a tul thu a sawi a. AIDS do kawngah leh a veite enkawla buaipui kawngah lungrual taka thawhho a tul thu leh inzirtirna zau zawk kalpui a tul thu a sawi bawk.

Meeting chuan Zoram Harh Rawh Campaign Intihsiakna chu November ni 15-17, 2022 a neih nise a ti a. A hmun atan Khawzawl Vengthar Branch YMA Hall chu ruahman chhin niin, program kimchang chu rel that leh ni se tih a ni a. October ni 20, 2022 hian DC Conference Hall-ah District Advocacy Programme buatsaih nise tih ni bawkin, programme kimchang chu CMO kutah dah a ni.

Mizo hnam lam leh Folk song hmanga intihsiakna, 'Zoram Harh Rawh Campaign' kaltlang intihsiakna hi hnam lam leh hlate hmangin neih a ni dawn a. Branch YMA hrang hrangte chu tel tura beisei an ni a. Intihsiakna turte hi Mizo folk song panga- Darmani Zai, Lianrikhumi Zai, Awithangpa Tlawh Zai, Labour V Force Zai, Domangi Zai hmanga intihsiak tur a ni a. Hemi zai thluk hmanga hla awm sa emaw, AIDS dona atana hla phuah chawp emaw hman theih a ni. A remchan dan anga live music emaw sound track hman theih a ni ang. Mizo folk dance pahnih - Cheraw (Kantluang) leh Khuallam hmanga inelna buatsaih tur niin, a pahniha lam tur a ni a. A remchan dan anga live music emaw sound track hman theih a ni bawk ang.

Inelnaa tel turte chu member 20 aia tlem lo zel an ni tur a ni a. Intihsiakna hi District Level-ah November ni 15-19, 2022 leh State Level-ah December ni 1, 2022 hian neih tura ruahman a ni a. District Level bikah hian pakhatnain Rs. 50,000/-, pahnihnain Rs. 30,000/- leh pathumnain Rs.10,000/- te an dawng dawn a. Heng bakah hian Branch 2 tan consolation prize Rs. 5,000/- leh tel dangte participation prize Rs. 1,000/- sem an ni bawk ang.