Zoram Research Foundation chuan vawiin hian Information & Public Relations Department Conference Hall, Treasury Square, Aizawlah Perspective on Mizoram Gross State Domestic Product (GSDP) tih thupuia hmangin Symposium-a buatsaih a. He hunah hian Mizoram GSDP leh a chhehvel chungchang zau zawka zirhona a ni. Pu Liansailova, Vice Chairman, Mizoram State Planning Board-in Keynote Address a sawi a. Dr. Lalrinchhana, Deputy Adviser, Mizoram State Planning Board-in thupui a sawi hawng a ni. 

Kar hnih khat liam taa India rama chanchinbu lian ber zinga mi INDIA TODAY-in Mizoram Gross Domestic Product (GDP) chu (Dollar) 1.5 billion chauh a nih thu leh chu chu India rama State zawng zawng (29) zinga hniam ber a nih thu a tarlanin engemaw ti zawng takin mi a barakhaih avang leh ngaihtuah zui tur thil tam tak mi thinlungah a chhawp chhuah sak avanga he sawihona hi buatsaih a nih ber thu tarlan a ni a. 

He huna Keynote Address sawitu Pu Liansailova chuan ram sum leh pai leh hmasawnna dinhmun tehna ber chu GSDP a ni thu sawiin sorkar hotute pawhin ruahmanna an siam dawnin GSDP hi an thlir hmasak thin a nih thu a sawi a. Fiscal deficit hnawhkhahna turin duh ang anga tih a rem loh thu sawiin GSDP atanga enrem hnuah hnawhkhah a nih thin thu a sawi a. 

Pu Liansailova chuan sawi zelin kum 2003-2004 a kan state financial liability chu kan GSDP aiin a sang a. Mahse, hemi hnu hian a tlahniam zawngin kan kal chho ta zel a. Tun dinhmunah erawh chuan state liability hi GSDP atanga tehin 46% ah kan indah thei ta a ni a ti a. GSDP hi state growth tehna leh financial management thuah pawh ceiling min siam saktu a ni a ti. 

Pu Liansailova chuan kan GSDP a 18.75% chauh hi agriculture sector-in a thawhchhuah a nih thu leh 25.61% chauh industry sector thawhchhuah a nih laiin 58% zet chu service sector thawhchhuah a nih thu sawiin Mizoram hi sorkar hnathawkte hlawha chawm kan ni reng chu thil fel lo tak a nih thu a sawi a. Kan rama kut hnathawktute thawhchhuahin kan GSDP-ah a contribute sang thei lo chu tu mawh nge tih leh engvangnge tih zawnchhuaha siamthat a hun takzet tawh a ni a ti a. Hei hian sum leh pai insemzai (wealth distribution) thuah pawh kawngro a su nasa hle a ni a ti. 

Zirchianna leh chikna (research) nei mumal lo va thil kan sawi mai mai thin chu kalsan zel a hun tawh thu sawiin mi thenkhatin revenue expenditure-a kan state sum 70% zet kan hmang thin tih an sawi thin chu a dik lo hle tih sawiin sorkar hnathawk hlawh (salary) a kan hman zat hi 38% vel chauh a ni a. Hei hian pension hlawh te, Muster Roll rawihna te, Autonomous District Council leh Board/Commission hrang hranga Grant-in-Aid kan pek te, Medical Reimbursement zawng zawng hi a huam vek a ni a ti bawk.

Kalkhawmte hian data leh statistics dik kan neih deuh deuh a tul zia uar takin an sawi a ni. 

He hunah hian university leh college-a Economics leh Commerce subject zirtirtu thenkhatte bakah chanchinbumi thenkhatte leh sorkar mi pawimawhte leh NGO hruaitu thenkhatte an tel a ni.