1436/2026-2027

Lawngtlai, 17th July 2026: Vawiin khan Lawngtlai bawrhsap Pu Donny Lalruatsanga kaihhruaiin DC Conference Hall-ah Dan lova Lawngtlai District lo lutte  khuahkhirhna  Standard Operating Procedure  (SOP) chhawpchhuah  leh an sumdawnna endik chungchang  ngaithuahin thutkhawm neih a ni a. Pu C. Lalsawmzuala, CEM, LADC chuan a telpui.

Pu C. Lalsawmzuala chuan kalkhawmte chibai bukin dan lova lo lutte  chungchanga sawrkar,VC, NGOs leh Kohhran ten thawhhona tha tak an neih thin chu vawnnun zel a pawimawh hle a ti a. Thenawm ramte nena insumdawntawn chu thil tha tak a nih rualin, Dan lova lo lutte  sumdawnna kawngah mumal taka inkaihhruiana siam a nih loh chuan a ram neituten an tuar thei dawn tih tarlangin, uluk leh fimkhur taka ngaihtuahna sen thiam a tul  hle a ti a. Hemi kawnga LADC leh District Administration - ten thawhhona tha tak an nei chu lawmawm a tih thu sawiin, tha taka thawhho leh hmalak ho a tul hle a ti a. A bik takin ramri a duty Assam Rifles - te mawhphurhna a sang hle a, mipuite himna hriaa an theih chin china lo fimkhur turin a ngen a ni. CEM chuan Lawngtlai District mipuite tana  himna leh ralmuanna siam chu  LADC sawrkar thil tum ber a nih angin, dan ang leh mipuite duh anga hmalak zel a nih tur thu a sawi bawk.

Pu Donny Lalruatsanga chuan sawrkarlaipuia Ministry of Home Affairs thuchhuak anga, Raltlante biometrict enrolment-kalpui mek a nih thu leh zawhfel tep a nih thu a tarlang a. A bik takin  Village Council (VC) tinte leh Hotel- te chu  raltlan  dan lo va lo lutte  dik taka lo chhinchhiah tur leh tumah lo humhim lo turin a chah a. Raltlan enkawl leh Dan lova lo lutte khuahkhirh chungchanga sawrkar hmalakna lo tawiawm tlat turin NGO, VC, Kohhran leh mipuite a sawm nghal a ni.

Thutkhawmah hian dan lova lo lutte leh sumdawnna kalpui thin te  zawm tur Standard Operating Procedure  (SOP) chhawpchhuah chu thlir ho a ni a. Mawhphurhna hrang hrang nei - Deputy Commissioner, LADC,  Superintendent of Police, Village Coincil, CYLA leh YLA Branch, Assam Rifles, leh NGOs-  ten an  hmalak tawh chin sawizauna an nei a. Tun dinhmuna  hmalakna an neihte chu tha tiin, hmalam hunah  tha leh chak zawka hmalak chhunzawm  zel ni se an ti a ni.

Standard Operating Procedure (SOP) Roles and Responsibilities of Stakeholders - chu a hnuaia link - ah hian dah a ni.