3987/2024-2025

Dated Kolasib the 26th January 2025: Tukin zing khan Kolasib DC tualzawl ah India ram Republic Day Vawi 76 na lawm a ni a. He hunah hian Kolasib DC Pu Robert C Lalhmangaiha chuan Khuallian niin hnam puanzar a pawt pharh a, Parade Contingent Chibai a chhang let a ni.

Khuallian chuan thu sawiin,  Constitution chu dan bu a ni satliah lova, ram inrelbawlna leh hmasawnna kal chho zel atana min kaihruaitu a ni tih kan hriat a pawimawh takzet a ni, a ti a. Kan ram danpui ina nghet taka a lo duan lawk, dik taka rorelna, intluktlanna leh in unauna te chu lo vul nawn leh se tih chu a duhthusam a nih thu a sawi bawk. Kolasib a sawrkar office hrang hranga   nikum chhunga an achievement te sawiin, achievement tha tak a awm theih nana thawktu zawng zawng te hnenah lawmthu a sawi bawk a ni.

Kolasib a India Republic Day vawi 76na lawmna hi zing dar 7 ah tan a ni a. Republic Day hi kumin hian Chawlhni zinga a tlak a vangin School Naupang atangin Parade Contingent neih a ni lova, Mualvum 1st IR Battalion atangin Armed contingent pakhat neih a ni.

Republic Day lawmna hi Kolasib hmun hrang hrangah pawh neih niin, Kawnpui leh Bairabi Sub Division ah pawh hman a ni a. Kawnpui SDO, Pu Mohammad Aaquib leh Bairabi SDO , Pi Josephine Zonunsangi ten anmahmni Division ve ve ah khuallian niin hnam puanzar an pawt pharh a ni.

Khuallian thusawi kimchang chhiar duh tan link ah hian dah a ni : https://dipr.mizoram.gov.in/post/the-76th-republic-day-celebration-speech-kolasib-district-robertclalhmangaiha-deputy-commissioner-kolasib-district