3522/2023-2024

Aizawl, the 26th January 2024: India ram Danpui hman tanna ni, Republic Day chu India ram hmundang te rualin Mizoram hmun hrang hrangah lawm a ni a. Mizoram khawpui ber Aizawlah chuan tukin zing dar 8 khan Sipai Lammualah he hun hi hman a ni. He hunah hian Governor Dr Hari Babu Kambhampati chuan India Hnam Puanzar pawtparhin Parade contingent 27 ten Hnam Puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.

Republic Day vawi 74-na puala thuchah sawitu Governor Hari Babu Kambhampati chuan Zoram mipuite duhsakna chibai a buk hmasa a. “January ni 26, 1950-a ram Danpui (Constitution) kan inpek atang khan India ram chu mipui thlante rorelna ram lian ber kan ni ta a. He kan ram Danpui hi khua leh tui zawng zawng tan dikna, zalenna leh intluk tlanna hum sak tlat tura duan a ni a. A pawimawh em avangin vawiinah pawh ram pumah a lawmna hun kan hmang tlang a ni.”, a ti.

Tun hnaiah Inthlanpui muanawm, felfai leh entawn tlak taka kalpui a nih avangin Mizoram mipui zawng zawng chungah lawm thu a sawi a. Sawrkar hna thawkte leh dan leh thupek kengkawhtute bakah, tlawmngai pawl hrang hrangte, kohhran leh a bik takin Mizoram People’s Forum (MPF) te’n inthlanna felfai tak nei tura theihtawp an chhuah avangin thinlung lawmthu a sawi bawk.

Hmasawn tur chuan remna leh muanna a pawimawh tih a sawi a. Remna leh muanna venhim hna thawktu police leh dan kengkawhtu hrang hrangte hmalakna mai bakah, NGO te, kohhran te, thuthar thehdarhtute leh mipui thahnemngaihna avangin India rama state muanawm ber kan la ni chhunzawm hi a lawmawm hle a ni a ti.

Governor chuan a sawrkarin hma a lak uar na tur lai te a hnuaia tarlan ang hian sawiin bul a tan a.

“Mizoram Sawrkar chuan ngaih pawimawh tur, khawtlang mamawh bulpui paruk atan zau takin hma a la dawn a. Chung zingah chuan hengte hi a tel dawn a ni:

- Sawrkar inrelbawlna tha siam
- Kil tina hmasawnna ngelnghet leh tlo siam
- Thil siamna lam (industry) puihbawmna pek leh ‘Bana Kaih’
- Khawtlang himna (social security) – hriselna leh eibara vantlang himna leh thlei bik awm lova hma lak
- |halaite hmakhua ngaihtuah
- Environment humhalh
- Thil tum hun rei zawk mamawh (Long term development project) siam a hmasawnna lian tham thlen
- Mahni thil thar chhuah leh siam chhuaha innghat economy nei tur a hma lak”.
Governor chuan a sawrkar chuan State sumpai dinhmun sawh nghet a, tihmasawn turin hma lak a tum a tih a sawi a. Sawrkar sum hmuh leh hman ral inbuk tawk leh sum enkawl dan felfai tak te, inrenchem, hmasawnna kaihhnawih lova sum hman tihtlem leh hmanraw hrang hrang enkawl leh hman dan tha leh felfai zawk te kalpui tum a ni ang a. Kan sumpai dinhmun sawh nghet turin insingsak nan hun eng emaw chen chu kan mamawh ngei dawn a n a ti. Hemi kawngah hian Governor chuan a Sawrkar chuan sawrkar hmasa hmalaknate pawh chhunzawm awm te chu a chhunzawm zel dawn a. Ruihhlo hman sual dona leh ruihhlo ngaite enkawlna lamah pawh nasa zawk leh chak zawkin hma lak a ni ang tih a sawi.

Governor thusawi kimchang : https://dipr.mizoram.gov.in/post/republic-day-2024-lawmna-aizawl-sipai-lammual-a-governor-dr-hari-babu-kambhampati-thusawi-26th-january-2024

Vawiin Republic Day vawi 74-na puala Governor in thuchah a sawi hnu hian lawmman semna hun hman chhunzawm a. Republic Day 2024 function-ah hian kumina Police Officer leh Police hnathawktha chawimawina dawngtute hnenah chawimawina tangkapui Governor Dr Hari babu Kambhampati chuan a hlan a. Nakuma lawman hlan tur pawh aurinna hmangin puan chhuah a ni bawk.

Vawiin Republic Day Program chhunga lawman semna hunah hian Mizoram atangin pa chhuanawm, mipui vantlang rawngbawlna atana a hun puma in pe, Pu Sangthankima chu Padma Shree 2024 chawimawina dawng tura thlan a nih thu puan a ni bawk.

List of the Police Personnel receiving Medals for President’s Police Medal for Distinguished Service (Republic Day, 2023), Police Medal for Meritorious Service (Republic Day, 2023), . President’s Police Medal for Distinguished Service (Independence Day, 2023), Police Medal for Meritorious Service (Independence Day, 2023), Governor’s Gold and Silver Medals and list of President’s Police Medal for Distinguished Service (Republic Day, 2024) : Republic day 2024 Police Award leh Parade Award Winner.pdf

Kumin Republic Day parade-ah hian contingent 27 an awm a - Armed Contingent 6, unarmed contingent 6, School Contingent 12 leh band party 3 an ni. Parade Commander hi Jessica Lallawmzuali, Dy. SP (Probation) a ni a; 2nd Commander hi Malsawmkima, Dy. SP (Probation) a ni thung.

Governor Dr Hari Babu Kambhampati chuan Parade Contingent zinga lam thiam zual thlanchhuah te hnenah lawmman a hlan bawk.

List of the Armed and Unarmed contingents receiving 1st, 2nd and 3rd positions: Republic day 2024 Police Award leh Parade Award Winner.pdf

AR Ground hmuna Republic Day 2023 lawmna inkhawm neih zawhah Governor Hari Babu Kambhampati chuan Circular Lawn, Raj Bhavan-ah sawrkar hotulu te leh sawm bik te pualin At Home program a buatsaih bawk a ni.