No.1861/2021-2022

Siaha; the 15th August,2021: Vawiin chawhma dar 10:30Am khan Circuit House kawtah, India Independence Day vawi 75-na (Platinum Jubilee) chu Pu Robert Romawia Royte,Hon'ble Minister of State for S&YS, Tourism.etc hovin urhsun tak leh Covid-19 SOP zawm chungin lawm a ni.

Khuallian Pu Robert-a chuan Guard of Honour chhanga, Hnam puanzar a pawtparhi hnuah, Independence Day vawi 75-na thuchah a sawi zui nghal a ni.

Khuallian Pu Robert-a chuan Covid-19 avangin khawvelah harsatna namen lo a thleng mek a, Mizoram pawhin kan tuar nasa hle a ni. He hripui laka kan him theihna tura thawktu- front line workers, VLTF/LLTF, Police Duty leh volunteers zawng zawngte zahna chibai ka buk a che u. Hripui do nana tha leh zung, sum leh pai thawh a, luangchhuak zawng zawngte hnenah lawmthu ka sawi bawk. Kan himna atana sawrkar ruahmanna siam- inkharkhip leh khuahkhirhna hrang hrangte chhel taka tuartu mipuite chungah thinlung takin lawmthu ka sawi bawk a ni, a ti.

Zalenna kan hmuh champha lawmnaah hian ramin hma a sawnna kawng hrang hrangte tarlan thin a ni a. Pu Zoramthanga kaihhruai sawrkar kum 2 leh thla 8 a upa hian hripuiin nasa taka min nuai lai pawhin theih ang angin hmasawnna hna a thawk a, tarlan vek sen ni lo mahse a pawimawh zual chauh ka tarlang dawn a ni, tiin kum 2020-2021 chhunga sawrkar hmalakna hrang hrang te a tarlangin, Siaha District bika department hrang hrang te hmalak tawhna leh hmalak mekte a tarlang a, amah department chan S&YS,Tourism leh ICT department in kum 2020-2021 chhunga an hmalakna hrang hrang leh hlawhtlinna te a tarlang bawk a ni. A Independence Day Speech hi he link ah hian atang hian en theih a ni. https://dipr.mizoram.gov.in/post/siaha-a-india-75th-independence-day-lawmna-a-pu-robert-romawia-royte-thusawi

Khuallian chuan Vawiiah hian he kan ram ropui tak ropuina leh inpumkhatna vawng hima, chawi nung zel tur leh Siaha District hmasawn nan leh mipuite hamthat nana thawk zel turin i inhlan thar leh ang u, tiin Siaha district mipui te a sawm a ni.

Vawiin Independence Day lawmnaah hian Khuallian chuan District Hospital Siaha hnenah Certificate of Appreciation, Ayushman Bharat Pradhan Mantri-Jan Arogya Yojana(ABPM-JAY) hnuai atangin a hlan bawk a ni.

Minister Pu Roberta hian Circuit house kawta Independence Day lawmna programme hman zawh hian District Hospital leh Maraland Gospel Centenary Hospital tlawhin, tanpuina Rs.10,000/- ve ve a hlan bawk.Minister hian MSO(H) hnenah Computer full set a present bawk.