No.2856/2021-2022
Aizawl Sahmulphah thla ni 2, 2021: Lawngtlai District Child Protection Committee (DCPC) meeting-in a rel angin, vawiin khan Lawngtlai DCPC member-te chuan Lawngtlaia naupang enkawlna hmun (child care institute) pathum - Lairam Motherless Home (LMH), Lairam Christian Adoption Centre (LCAC) leh Lawngtlai Observation Home (LOH) te an tlawh a. An dinhmun leh mamawh te a hmunah an enfiah.


Lawngtlai DCPC member-te hi hmun hnihah inthenin, team khat hi Additional Deputy Commissioner Pu James Miahlung chuan hovin, team khat dang hi Sub-Divisional Officer (Sadar) Pi TT Beikhaizi chuan a ho thung a. Thawktute'n lo dawngsawngin, an hnenah hian an dinhmun leh mamawhte an lo thlen a, hmasawnna atana thil pawimawh hrang hrangte sawi ho a ni bawk.

He'ng hmunah te hian naupang enkawl ngaite'n enkawlna tha tak an dawn chhunzawm zel theih nan naupang himna tur ngaihtuah a, naupang laka hleilenna thleng a awm loh nana theih tawp chhuaha fimkhur zel turin thawktute chu chah an ni a. LMH tan naupang inawm tleina leh intihhlimna hmanrua (toys) ngaihtuah belh a, thiam thil zirtirtu (vocational instructor) an neih theih nana hma lak ni se tih niin, DC hma laknain an building kawt zawl siam thatsak dan ngaihtuah ni se tih a ni bawk.

Tun dinhmunah naupang enkawl leh venhim ngaite enkawlna LMH-ah hian naupang 22 awm mekin, dan anga fa lak lam buaipuitu LCAC-ah naupang 1 leh naupang dan kalha awmte enkawlna LOH-ah naupang 2 an awm mek a ni.

Attachment

  • Loading attachment...