No.4102/2021-2022
Aizawl Ramtuk thla ni 24, 2022: Election Commission of India (ECI)-in India ram pum huapa inthlan chungchang mipui hnena puan darh zau a nih theih nana intihsiakna a buatsaih, "National Voter Awareness Contest" chungchangah Lawngtlai District Election Officer Dr Andrew H. Vanlaldika chuan vawiin khan Lawngtlai DC Conference Hall-ah thu thar theh darhtute kawmin, intihsiakna kalphung leh hriat tur pawimawh hrang hrangte a hrilhfiah.

Election Officer Pi B. Malsawmtluangi leh SVEEP Nodal Officer Pu C. Lalhruaitluanga, DIPRO te chuan District Election Officer hi tawiawmin, ECI buatsaih National Voter Awareness Contest-ah hian tu pawh tel theih a nih angin, Lawngtlai District atanga mi tam zawk an tel theih nana hma lak dan turte chu thu thar theh darhtu, MJA Lawngtlai District member-te nen sawi ho a ni a. Lawngtlai District hming thatna tur leh India ram district dangte zinga District hming pho lanna turin District mipui a tam thei ang ber tel turin District Election Officer chuan thu thar theh darhtute kal tlangin mipuite a sawm a ni.

National Voter Awareness Contest hi January ni 25, 2022 atanga kalpui tan niin, March ni 15, 2022 thleng tel theihna hun hawn a ni a. Thupuiah, "My Vote is My Future: Power of One Vote" tih hman niin, intihsiakna chi hrang panga - thil inhriatsiak (quiz contest), au hla inphuahsiak (slogan contest), hla inphuahsiak (song contest), video insiamsiak (video making contest) leh hriattirna mit la insiamsiak (poster design contest) te a awm a. Lawmman tha tak tak siam niin, quiz-a tel turte chu contest website - ecisveep.nic.in/contest/ -ah inziah luh a, online-a chhan tur a ni a; a bak zawng hi voter-contest@eci.gov.in -ah email hmanga theh luh tur a ni thung. Intihsiakna kaihhnawih hriat tur pawimawh hrang hrang chu ECI website-ah tar chhuah a nih bakah, Lawngtlai District Election Branch-ah zawh fiah theih reng a ni.